JAGAHON DIRIM, UNANG JEHEHON TUHAN JESUS

JAMITA PARTANGIANGAN PASSION

di HKBP Jl. Letjend. SUPRAPTO, JAKARTA

BORNGIN PADUAHON, Rabu, 20 April 2011

Turpuk: Lukas 22: 1-6

 

 

JAGAHON DIRIM, UNANG JEHEHON TUHAN JESUS

 

Huria ni Tuhanta,

Somal do dipatupa Partangiangan Passion laho marningot muse “via dolorosa” (jalan menuju salib). Asa marhite i tangkas jala bagas diantusi saluhut angka na porsea maksud dohot tujuan ni panghophopon ni Tuhan Jesus. Marragam do tarida di tingki passion angka pangalaho ni jolma na humaliang Jesus. Adong ma i na patuduhon las ni rohana marhite na patuduhon siboanboanna tu Tuhan Jesus, adong do i na reaktif patuduhon pembelaanna hatiha didok Jesus taringot parsorionna, adong do na mempersoalhon  kedudukanna asa ise do sian nasida na sumangap, adong do na so manghalomohon pangajarionNa ala terganggu eksistensi manang kedudukan di tongatonga ni bangso i.

Turpukta on manaringoti sada sian pangalaho i ima si Judas Iskariot, sisean parjehe i. Sasitongna, molo sambolus maol do dapot rohanta hadirion ni si Judas Iskariot on, ai tangkas do ibana sahalak sian sisean ni Tuhan Jesus, sahalak sian sampuludua sisean i, jala sahalak bendahara ni nasida na sapunguan i. Tangkas do rupani pamilliton na tu ibana. Ndang songon angka sisean na asing rupani, i ma angka natorop i, na sipata raphon Jesus, sipata ndang. Intens do pertemuan manang parjumpangan nasida. Jala sude do patar dipatuduhon Tuhan Jesus hadirionNa, sangkap na binoanNa tu portibi on. Alai boasa ma ingkon pulut roha ni si Judas Iskariot on laho manjehehon Tuhan Jesus? Nian nunga tung mansai tangkas dipalumba Tuhan Jesus adong sian tongatonga ni angka sisean na marsangkap laho pasahathon Ibana. Antong, tauji ma jolo mamereng aha do nanaeng dohonon ni turpuk on tu hita.

1.    Di ayat 2 didok “Jala sai dipingkiri angka sintua ni malim dohot angka sibotosurat dalan mamusa Ibana, ai dihabiari nasida do natorop i.” Jotjot do tabege, molo di dunia politik ndang adong dongan manang musu (tidak ada kawan atau lawan), asing ni perbedaan kepentingan. Na marlapatan do i, perbedaan kepentingan i boi do mambahen sasahalak gabe dongan manang musu tu na asing. Alai molo sarupa kepentingan, musu i boi do i gabe dongan, jala dongan i boi do gabe musu. Tangkas do sian pamaritaan ni Injil taringot tu hadirion ni angka halak Farisi dohot angka Siboto surat, angka malim di tongatonga ni bangso i na manghasogohon pangajarion ni Tuhan Jesus. Alai ndang tarbahen nasida laho mangagohon Jesus ala sude angka na torop i “jatuh cinta” tu Jesus. Nunga terlanjur terkenal Jesus di angka pangajarionNa dohot angka pambahenanNa marodophon angka na pogos, angka na mardosa. Talu do, popularitas ni angka malim marolohon popularitas ni Tuhan Jesus. Marhite i, gabe diadopi angka malim do godang persoalan.

Gabe sada kelompok ma sintua ni malim, Farisi dohot angka siboto surat maralohon Tuhan Jesus. Sian kondisi si songon i do gabe di sada kepentingan nasida laho mamunu Jesus. Ido ironis na, angka partogi manang malim na ingkon mamboan hasintongan gabe marsangkap na roa holan ala ni popularitas, ala ni kepentingan, jala dipatupa i di tingki naeng mandapothon ari raya Paska, i ma perayaan kemerdekaan ni Israel, hape laos dibuat nasida nang kemerdekaan ni sasahalak ima Jesus i sandiri.

2.    Di ayat 3 didok “Alai dibongoti sibolis i do si Judas na margoar Iskariot, sahalak sian na sampuludua i.”  Dibongoti sibolis sisean ni Tuhan Jesus. Dison do tangkas taboto, ndang alani status na adong didirina songon sisean gabe mabiar sibolis mamongoti si Judas. Ndang. Jadi, tu sude do barani sibolis i, ndang adong dihabiari sibolis. Jala, diunjuni sibolis do Tuhan Jesus tingki di halongonan asa marsomba ibana marhite nanaeng lehononna sude angka isi ni tano on. Asa hamuna angka dongan, sotung tarpodom hita, i do nanidok ni Jesus “dungo ma hamu jala martangiang”. Holan i, perbedaan ni si Judas tu Tuhan Jesus, molo si Judas dijalo do gogo ni sibolis i, alai molo Tuhan Jesus dialo jala dipalao do sibolis sian adopanNa. Na marlapatan do i, huaso ni sibolis margogo manang ndang tergantung tu pilihan ni jolma do i, olo do manang dialo do.

Boi do dibongoti sibolis jolma molo dilehon rohana tusi. Ido sasintongna nang na masa tu raja Saul maradophon si Daud. Tung mansai sogo do roha ni Saul marnida si Daud. Sogo ni rohana i do na mambahen nangetnanget bongot tu ibana tondi na jahat jala ruar sian si Saul tondi ni Debata.

Na gabe sungkunsungkun nuaeng, boasa dipaloas si Judas sibolis i mamongoti rohana? Adong manang piga faktor, ima:

a.       alani hepeng. Di ay. 5 didok “Jadi sian las ni rohanasida marpadan ma nasida, mangalehon hepeng tu ibana”. Ido dalan dibahen angka sintua ni malim asa gabe sada kepentingan nasida dohot sahalak sisean ni Tuhan Jesus, si Judas Iskariot ima marhite hepeng. Pola sahat tu na marpadan, jala di padan i, las do roha ni angka sintua ni malim. Hepeng do hape sibonsirina. Marhite na martuptup, molo di Alkitab didok “berunding”. Angka sintua ni malim na mangula di bagos joro ni Debata, angka halak Parise na maniop hot patik, jala sahalak sisean ni Tuhan Jesus “berunding” (martuptup) mangulahon na roa. Segana i??? Alai ido na masa, nang pe nian pilihan do i, alai tangkas do dipillit si Judas Iskariot laho mamunu Tuhan Jesus alani hepeng. Alani tajagahon ma sotung gumogo hepeng i di dirinta gabe dijehehon Tuhan Jesus.

b.      Holan si Judas do sisean ni Tuhan Jesus na so halak Galilea di angka na jonok tu Tuhan Jesus. Jala tangkas do taboto pamor ni halak Galilea hatiha di tongatonga ni angka bangso i. Sahalak Judea do ibana, jala dirajumi rohana, tumimbo do kebudayaan manang adat ni halak Judea sian halak Galilea. Ndang tarjalo ibana kepemimpinan ni halak Galilea.

c.       Kecewa do si Judas di tujuan hakiki ni kepemimpinan ni Tuhan Jesus, ai dirajumi rohana songon sahalak Zelot ibana, asa merdeka bangso i secara politis sian gomgoman si penjajahan Rom. Hape ndang songon i anggo sangkap ni Debata marhite Jesus Kristus, asa malua do bangso i sian gomgoman ni sibolis laho manjalo sangkap haluaon sian Jesus i sandiri. Perbedaan kepentingan si songon on boi do gabe dalan asa ndang saurdot. Sotung asing kepentingan ni na marTuhan sian dirinta marodophon sangkap ni Debata. Tasulingkiti ma dirinta, atik tung asing sangkapta laho mangihuthon Kristus i? Asa sude ma hita mangihuthon sangkap ni Debata, asa disi do hasadaonta, asa unang marasingasing dalanta, Kristen hita hape tatondong dalan hamagoan.

Huria ni Tuhanta,

Judas do na gabe sada contoh sisean na manjejehon Tuhan Jesus. Alai hadadabu ni si Judas, ndang masa songon i manang kebetulan, alai dilakukan dengan sadar, sebagai sesuatu pilihan. Ibana ma na gabe informan (orang dalam) na paboahon saluhut angka informasi taringot tu Tuhan Jesus dohot saluhut angka ulaon na sapunguan i.

Tarbarita do sikap dohot pangalaho ni si Judas on di liat portibi on sahat tu saonari. Molo songon na manimbil sikap dohot tindakan sasahalak sian statusna didok halak do i si “Judas” do ho. Hansit do hape stigma manang cap tu angka na parjehe. Alani, sotung olo hita gabe si parjehe tu Tuhan Jesus tarlumobi. Asa, boha ma bahenonta asa unang gabe si parjehe (pengkhianat) hita? Taihuthon ma sangkap ni Debata, taambalongkon ma sangkapsangkapta, ido na nidok ni Jesus Dung i didok Jesus ma tu angka siseanna: Nasa na giot mangihuthon Ahu, disoadahon ma dirina, diporsan ma silang na tu ibana; diihuthon ma Ahu!” (Mat. 16: 24).

Jala ingot ma hata ni Tuhan Jesus, alai ganup na mansoadahon Ahu di jolo ni jolma, laos soadahononku do i di jolo ni Damang na di banua ginjang i!” (Mat. 10:33). Alani dungo ma hita jala martangiang. Amen

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s