POS MA ROHAM DITANDA JALA DISARIHON DEBATA DO HO

POS MA ROHAM DITANDA JALA DISARIHON DEBATA DO HO

Mateus 10 : 26 – 33

1.    Dipaborhat Tuhan Jesus do siseanNa na sampula dua i. Borhat mamaritahon Barita Nauli, pamalumhon nasa sahit dohot tihas, pangoluhon angka na mate, pabalihon angka gogo sibolis dohot angka ulaon na asing. Diboto Tuhan Jesus do borat dohot hamaolon ni uloan na ampe tu siseanNa jala dipabotohon Ibana do ragam ni angka hamaolon i, ima hosomanna ma nasida, ditogu tu panguhuman, dilelei, dilinsingi sahat ro di agoan hosa. Alani i, andorang so borhat dope angka siseanNa i, dilehon Tuhan Jesus ma bohal na mansai arga, ima huaso dohot angka ragam ni sipaingot dohot pangajarion. Ingkon sahat do Barita Nauli tu saluhut jolma nang godang angka hamaolon na diadopi. Lapatanna, nunga dibasabasahon Tuhan Jesus gogo dohot huaso tu nasida, asa basabasahonon ni nasida i nang tu saluhut jolma. Ndang holan di diri ni nasida sambing silehonlehon i, alai ingkon dohot do saluhut jolma marparsaulihon manang mandai basabasa ni Debata.

2.    Di ragam ni hamaolon na naeng siadopan ni nasida, disosohon asa bisuk ma nasida songon ulok jala lidang songon darapati, ai songon birubiru do nasida disuru tu tongatonga ni babiat (10 :16). Nang pe tu tongatonga ni babiat, alai ndang jadi mabiar nasida disi. Di turpukta on sampe do 2 hali didok: “Unang mabiar”. Molo pe dibunu nasida alai holan sibunu daging do i, ndang tuk i sibunu tondi. Ai holan Debata do na tuk sibunu daging dohot tondi jala holan tu Debata do nasida mabiar. Laho papaposhon roha ni angka siseanNa i huhut pamagohon biar sian roha ni nasida, di turpukta on dipatudos Tuhan Jesus ma songon amporik dohot obuk. Didok Ibana, dua amporik digadis arga sauang (sauang = hira-hira Rp. 20,-). Lapatanna, mura do arga ni sada amporik i, hape tung sada pe amporik madabu i tu tano sian parbinotoan ni Debata do i. Suang songon i nang orbuk, diboto Debata do godang ni obuk na di ulunta; dibilangi Debata do i. Sian i boi dohononta, diboto Debata do piga na madabu (marurus) ganup ari. On ma tudosan na dibahen ni Tuhan Jesus tu angka siseanNa i, na patuduhon hinaarga ni siseanNa i di Debata dohot panandaon ni Debata na mansai tangkas di nasida. Ndang adong na lipe dibagasan pardalanan dohot ngolu ni siseanNa i sian parbinotoan ni Debata. Aha ma nian arga ni sada amporik manang sada obuk, alai ipe tong do bagasan parbinotoan ni Debata.

3.    Alani i ma ndang pola mabiar be nasida manghatindanghon Jesus tu saluhut jolma, ai diramoti Debata do nasida ro di salelenglelengna. Ndang jadi maila be nasida mamaritahon goar ni Jesus. Ai ganup na olo manghatindanghon Jesus dijolo ni jolma, i do hatindanghonon ni Jesus di jolo ni Debata.  On ma na naeng ingotonta na di ngolunta, arga do hape hita di jolo ni Debata, nang pe sipata tapanghilalahon ndang apala arga hita di donganta jolma. Alai dumenggan do di hita, molo taauhon hinaarga ni ngolunta di Debata. Dipatuduhon Debata do i marhite anakNa Tuhan Jesus na mamboan hita tu haluaon na salelenglelengna. Durus do mudarNa manobus hita. Na mangihut muse, tangkas do ditanda Debata hita; roha, pingkiran, hagogoon, hagaleon dohot sude keadaan ni pamatangta. Ai apala obuk na di simajujungta pe hape dibilangi Debata. On ma na mansai ringkot sipahusorhusoronta di bagasan rohanta. Jala ima na paposhon rohanta mandalani ngolunta na gok parungkilon manang arsak ni roha. Na tangkas ingkon botoonta do, diboto Tuhan Jesus do adong angka ambatambat dohot arsak di jolonta na naeng bolusonta, songon naung dipaboaNa tu angka siseanNa i. Alai na na tangkas suan di haporseaonta ima, ndang tuk angka ragam ni hamaolon i mangago hita, ai Debata do nampuna hita jala nunga dibohali Debata hita marhite bisuk, gogo, roha na lidang dohot huasoNa. Ima tapangke sinjatata mangadopi angka galumbang ni ngolunta.

4.    Sipahusorhusoron ni roha.

a.     Songon Ama, aha ma mambahen hita jotjot mabiar manang tahutan di ngolunta on. Boha do hita marnida dohot mangalo angka biarta i?

b.     Songon tanda  naung tajalo jala tadai denggan basa ni Debata, aha ma na boi sipatupaonta tu angka donganta jolma dohot tu huriaNa, ima dalanta laho mamaritahon Barita Nauli i !

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s